Keppni í strandblaki hófst í dag

Keppni í strandblaki á Smáþjóðaleikunum hófst í dag á glænýju og stórglæsilegu strandblakssvæði í Laugardalnum.Þetta er í fyrsta skipti sem landsleikir í strandblaki fara fram hér á landi og því ástæða til að gleðjast þó veðurguðirnir hafi ekki verið með keppendum í dag. Þónokkur vindur var og mjög kalt og á tímabili féllu nokkur snjókorn.

Í karlakeppninni tóku Einar Sigurðsson og Orri Þór Jónsson á móti liði frá Andorra og sáu þeir lítið til sólar í þeim leik. Andorramenn, sem unnu brons á síðustu leikum, léku vel og nýttu vindinn rétt og varð fljótt ljóst að íslenska liðið átti við ofurefli að etja. Svo fór að þeir töpuðu 2-0, fyrri hrinunni 21-6 og þeirri síðari 21-5.

Þær Berglind Jónsdóttir og Elísabet Einarsdóttir, sem skipa kvennalið Íslands, léku hinsvegar vel í dag og sigruðu Liechtenstein í æsispennandi leik 2-1, þar sem oddahrinunni lauk með 15-13 sigri eftir að staðan hafði verið jöfn 13-13. Í fyrri hrinunni sem vannst örugglega 21-13, gekk allt upp. Móttaka og blokk var góð og sóknirnar einnig og yfirburðir þónokkrir. Í annari hrinu lentu þær hinsvegar undir og gerðu mun fleiri mistök en í fyrri hrinunni. Þó nokkrar góðar skorpur hafi komið inn á milli þá dugði það ekki til og tapaðist hrinan 21-15. Oddahrinan var gríðarlega spennandi og skiptust liðin á að hafa forystuna. Í stöðunni 13-13 missti Leichtenstein fleig út af vellinum og íslensku stelpurnar nýttu tækifærið og kláruðu leikinn 15-13.

Á morgun leika bæði íslensku liðin gegn Kýpur. Karlarnir klukkan 16:30 og konurnar klukkan 17:30, en þar má búast við hörku spennandi leikjum.

Úrslit dagsins í strandblaki voru þessi:


Karlar A LIE-MON 12:00 2 : 0 (21:18) (21:15)
Karlar B CYP-SMR 13:00 2 : 0 (21:18) (21:11)
Konur LUX-CYP 14:00 0 : 2 (10:21) (18:21)
Karlar B AND-ISL 16:30 2 : 0 (21:6) (21:5)
Konur MLT-MON 15:30 0 : 2 (18:21) (20:22)
Konur LIE-ISL 17:30 1 : 2 (13:21) (21:15) (13:15)

Leikir morgundagsins eru eftirfarandi:

Karlar A LUX-MON 12:00
Karlar B AND-SMR 13:00
Konur LIE-MLT 14:00
Konur LUX-MON 15:30
Karlar B CYP-ISL 16:30
Konur ISL-CYP 17:30

Meðfylgjandi myndir eru af íslensku kvenna og karlaliðunum í strandblaki ásamt þjálfurum sínum.
Einar Sigurðsson þjálfar kvennaliðið en Karl Sigurðsson karlaliðið.
Nánari fréttir og upplýsingar um leiki og leiktíma má sjá á heimasíðu strandblaksins, www.strandblak.is.

Einnig má hafa samband við fjölmiðlafulltrúa strandblaksins, Lilju Jónsdóttur í síma 695-1710 og Kristínu H. Hálfdánardóttur í síma 892-6478.