Lúxemborg hafði betur gegn Liechtenstein í jöfnum leik

04.06.2015 15:32
Lúxemborg vann sinn fyrsta leik í blaki kvenna á Smáþjóðaleikunum 2015 þegar liðið lagði Liechtenstein í oddahrinu í fyrsta blakleik dagsins.

Liechtenstein komst yfir snemma í fyrstu hrinu en Lúxemborg snéri henni fljótt sér í vil og vann 25-19.

Lið Lúxemborgar var komið í afar vænlega stöðu um miðbik annarrar hrinu, 16-7 og aftur í 21-17. Lið Liechtenstein gafst ekki upp og tókst á ótrúlegan hátt að innbyrða 24-26 sigur.

Lúxemborg var með yfirhöndina í þriðju hrinu og vann hana 25-23 en Liechtenstein svaraði strax með sömu stigatölu í þeirri fjórðu.

Liechtenstein var yfir 3-5 í oddahrinunni en eftir það tók Lúxemborg völdin og vann hana 15-13.

Nú er nýhafinn leikur Lúxemborgar og San Marínó í karlaflokki. Stórleikur er hins vegar framundan í kvennablakinu klukkan 18:00 í kvöld þegar Ísland mætir Svartfjallalandi en bæði liðin eru með fullt hús stiga.

Í síðasta leik dagsins mætir karlalandsliðið Mónakó. Viðureignin hefst klukkan 20:30.
Til baka